Panon Batin

Mangsa ngarandeg na hampalan kahayang

Nyuay na gerentes qolbu

Kasorot ku nur elmuna guru

Nuyun sumujud  ka nu ngusik malikkeun badan sakujur

Pikeun eling sangkan salawasna dikir ka Dzat Nu Maha Agung

Nafas mawa kana panon batin nyaliksik ati neangan tapak tilas nu baheula

Singhoreng gambar-gambar pamusyrikan patulayah  ngabelegbeg minuhan bilik hate

Sang guru wakca, geura tobat tur pepes amarah jeung lawamah

Mibanda hate bersih tur suci sangkan dugi ka Dzat Ilahi

Poma na incak saparipolah ulah gumantung ka sasama makhluq

Teuleuman tekad na talaga kama’rifatan sangkan meunang safa’at di gedengeun Nu Maha Welas tur Asih

MULANG  KA  ILAHI

Tutur Sepuh pikeun rundayan,

Anaking  hidep masing miboga du’a Saepi;

Ngawincik  Saepikiran, ngambah kahirupan,

Neureus kana kolbu ngadep cahaya,

Mupus kamusrikan batin nu nyumput lantip,

Mangka nyangking  akidah  kaRosulan.

Poma hidep kudu boga Kuda,

Dina harti kudu daekan,

Daekan nyuprih tur neuleuman elmu,

Pakakas memeres lahir  jeung  batin,

Gera apal ka diri nuyun mulang ka Ilahi.

(kintunan  ti patapaan lempongsari, ku yayat ahadiat)