TINA KAHIRUPAN

LALANGSE

(ku nimasgaluh)
 

Pajar waktu  mere omber,

ngaguar neangan jalan,

lumangsung sapoe jeput,

pikeun nembongkeun kareueus,

ka nu karek nembongan,

ilahar kaagul datang,

datang  na tangkeupan,

atuh,  angin eureun teu laju,

kapegung  ku  kabingung,

kacandet …

ampeg  kaheneg  ngulibek  jero  dada,

kolesed  kahempikan  ku sawangan
 

PANSUS

(ku nimasgaluh, 2011)
 

Turun tina hasil gunem catur,

jadi bewara nu kacapangan,

sanajan samar-samar jadi caang ngempray,

meunang ngaguliksek disiaran,

wakil rakyat tigin moro bebeneran,

sangkan  mawa  hasil  nu  nyugemakeun,

tilu babak buka layar,

pating gorohel nu ngarempag aturan,

dikandangan,

sugan sadar atawa tambah buringas ?

manusa, manusa ngarengkak boga akal.

NGARAKAL

(ku nimasgaluh, Desember 2011)
 

Hujan hujanna  mah, na aya ku bayeungyang,

angin ngahaliwir  kesang ngucur,

suku disanghunjarkeun angger teu genah,

ngarenghap napas jero,

gening bodo kasima ku nu ngarakal,

nyalindung kana papagon, cenah...

tempo hasilna tuh reugeujeug,sugan,

nu baroga pamangkas ngabalieur,

teu inget sumpah jabatan,

leueur palid na jalantah,

kaheneg ditalikung sihung papayung.
 

GEURA

(ku nimasgaluh, November 2011)
 

Sora murudul turun  patali marga,

wiwitan nyiwit pupuhu,

seah, lumungsur ti kaprabonan,

saha nu bisa ngajagaan?

mahal, teuing beungeut badakeun,

na jeroeun tasma mata simeuteun,

bisa keneh seuri.
 

SIKI NANGKA

(ku nimasgaluh,Mei 2009)
 

Nagari ngageuri

Geuning bet kamalinaan

Urang ulin ka mumunggang paul

Teu katingali ka mana nya mulang?

Pating cakakak nu galumbira

Nyugemakeun lampah masagi na kadali emosi

Naha teu inget yen poe isuk aya keneh nu ngarengkenek

Makihikeun siki nangka sasiki? 
                                                         

NAPAKURAN DIRI

(ku nimasgaluh, Februari 2010)
 

Basa raga dikurung kesang nu luut-leet,

Getih karasa naek minuhan raga,

Paroman beureum,

Nyurungkuy nyaksrak muringkak luareun kulit,

Napas kerep rumenghap,

Nguliat kulapes ngarumpuyuk,

Geuning teu daya  teu upaya  …            

LEMBUR SINGKUR

(ku nimasgaluh, Februari 2010)

Warna koneng ngaplak ngampar

Kolecer katebak angin ngawirahma, sorana ngagalindeng

Tingarendag tali nu butbet di pasawahan

Keprak keprak kokoprak ngeprakan

Burudul bondol haliber

Diseungseurikeun bebegig, dudukuy toklok

Rarakaan nu warna koneng dihias endog jeung sabrang

Haseup ngelun muput nyamu jeung menyan

Teu lila etem ngarigel surti mipit sri pohaci nu gareulis

Oeeeeeeeeeeeeee  oeeeeeeeeeeeeeeeeeeeeeee

Sora tarompet jarami lir ngomando

Sangkan gawe tereh kempol 

KALANGENAN

(ku nimasgaluh, April 2008)

Mangsa hujan baheula mah dipapag,

Ku parentulna supa, supa kotok, supa bulan,

Supa rampak, kalan-kalan supa kidang,

Aya deui supa suung geus lir supa pare mah,

Matak resep mapay-mapay pakebonan,

Mulang-mulang wanci asar bari rebo ku tiiran supa

                     Baranang bentang dipasieup cahaya bulan              

                     Barudak ear-earan samulangna ti tajug

                     Kolotna nyerangkeun tina golodog

                     Nempo barudak arulin

                     Aya nu babadean, uucingan, ucing kalangkang, jeung gobag

                     Mun cape  ngariung ngadalahar suuk, seupan hui, ganyong,

                     Sampeu boh taleus, nginumna didorong ku bajigur

                     Waas nya? 

NYAWANG  
                                                                                     

Pameunteu neuleuman na jero hate

Awor rasa tresna nu teu weleh geugeut

Hambalan tincakeun ngemu kasono

Na kiceup neuteup paamprok  asih

Aya kahariwang?

Pependeman kaheman ka salira mo aya

Nu bisa ngaludang

Reueus  kacinta kula

Anjeun lir cai ngeclak nu nyiram kahirupan

Hurip jeung hirupna kanyaah ti salira

Tanda saayunan

Ngulibek mageuhan tali kadeudeuh

Ngarangkep sahurunan

Kula salawasna na hate anjeun       

MANGSA PASINI
 

Sareretan na juru soca aya nu neumbag kana dada

Kakuping renghap napas ngayunkeun ka alam baheula

Teu karaos panangan ngusap mastaka

Nyacapkeun katresna, cipanon ngembeng nyebor kaasih

KAHEMAN
 

Runtuyan kembang anggrek warna bungur

Nganteur kasmaran ka salira

Oyag katebak angin peuting

Lir lambe imut ngagelenyu

Bentang masieup, mega tingarudat

Paheut maheut layeut na amparan geugeut

                    (ku nimasgaluh, Januari 2010)