BADODON AKI BALANGANTRANG
Kacaritakeun di hiji tempat, harita teh wanci
janari leutik, nini Balangantrang lilir tina sarena lantaran kagareuwahkeun ku kongkorongokna hayam jago di paranje nu aya
di tukangeun imahna. Si nini bari gigisik panon, ngagerendeng “Aduh aduuuh na ngimpi teh teuing
ku aheng, mana Si aki sare keneh”, bari terus ngagudagkeun si aki, pokna : “ Yeuh Aki geura nyaring atuh nini boga carita, aki-aki kolot ku maneh teh
mani kebluk-kebluk teuing sare!” Si Nini bari terus kukulutus. Antukna Aki Balangantrang
milu hudang oge, da si Nini ngan kutuk gendeng bae. “ Aya naon atuh Nini, mani tara ti sasari hudang teh poek keneh?
Pan biasana gen sok kerek keneh wayah kiwari teh!” Aki Balangantrang ngomong ka
si nini. Si nini keom pedah si Aki ngomongna bari kumetap terus ngajawab : “
Yeuh Aki, Nini teh ngimpi ngajul bentang, eta bentang teh ragrag kana lahunan Nini!”
Si Nini nyaritana mani hariweusweus. “Euleuh-euleuh atuh eta mah rek meunang
rejeki, Nini!” Si Aki rikat nempas caritaan Si Nini, tuluy neruskeun omonganana
: “ Boa-boa badodon Aki pinuh ku lauk, pan Aki teh naheun di walungan, bakal
dahar ni’mat atuh urang teh, Nini!” Atuh
Nini Balangantrang ngarasa bungah ngadenge
caritaan si Aki, lantaran poe eta rek meunang lauk loba,
Bral eta Nini jeung Aki Balangantrang teh
arindit ka beh kidul kundang obor baralak, maksudna rek neang badodon tea.
Barang anjog ka sisi walungan, breh katingali di tengah walungan aya nu nyelak
herang, katojo cahaya bulan purnama ka janarikeun.
“ Nini, euleuh itu aya nu herang naon nya?” Si
aki nyaritana rada tarik. Atuh si nini teh ngarenjag bari nempo walungan nuturkeun panunjuk si aki.
Si Nini rada ngahuleng bari mencrong “heueuh
Aki naonnya?” Si Nini kalahka malik nanya.
“ Dasar Nini peot ditanya kalahka malik nanya,
atuh mun kami apal mah moal ge nanya ka nyaneh” Aki Balangantrang nembalan bari
ngagerendeng. “ Halik Nini urang turunan bari sakalian nyait badodon” Si Aki
singkil nyinglidkeun calana pangsina,terus turun ka walungan mapay sengked nu
maranti.
Aki Balangantrang ngajentul ngajarumeneng naon
nu aya di hareupeun teh, hiji kandaga nu dipahat warna emas. “ Nempo
kana ieu kandaga lain jalma jore-jore nu mibogana, dalah uing urang kampung
bau lisung tapi uing teu bodo-bodo
teuing pasti barang ieu, barang nu menak.Ah rek dibawa bae, dihanjaatkeun ka
darat bari ditempokeun ka si nini, barang teh nu batur sanajan heueuh ayana di
walungan kapalidkeun, uing lain hakna. Tapi ketang…” teu kebat si aki
galecok na pikirannana kapegat ku si nini ngageroan “ Aki barang naon eta teh?
Barina ge geuwat bawa ka dieu uing hayang nyaho naon eusina eta barang!”
“ Heueuh ke dagoan, uing rek nyait badodon heula “ Si Aki nembalan, bari ngaleos ka
hilirkeun kira lima lengkah ti tempat kandaga nyangsang, kandaga di gandong
make sarung. Aki Balangantrang hanjat muru ka Si Nini nu geus teu sabar
ngadagoan salakina, teu geura hayang nyaho naon eta eusi kandaga teh. Si Aki
kuat ngarahuh, napasna ngahegak dadana turun naek, kolesed badodon digolerkeun
terus kandaga tina aisanana dilaan lalaunan kalayan diteundeun hareupeun Si Nini.
“ Aki geuwat buka, uing hayang nyaho naon atuh
eusi kandaga teh! “ Nini Balangantrang
geus teu sabar nitah muka.
“ Heueuh ke heula Nini, mending dibuka di imah
bae ngarah nyalse “Aki Balangantrang nembalan, bari ragamang kana kandaga rek
diais deui.
Si Nini rikat narik kandaga, atuh antukna Aki
Balangantrang jeung Si Nini pabetot-betot “ halik aki-aki peot bisi ruksak
deuleu, jabana ge na mani kudu di imah dibukana? Kabeurat-beurat dibabawa ka
imah mah, ari heug eusina ngan bugang ucing!” Si Nini ngomongna bari manyun.
Aki Balangantrang ngelehan “ Nya seug atuh di dieu
dibukana nini cerewed …! “
Aki jeung Nini Balangantrang pahareup-hareup
nyanghareupan kandaga, lalaunan kandaga dibuka,
barang bray kandaga muka, Si Aki jeung Si Nini bareng nempona atuh jeduk paadu
tarangna “ deulu siah Nini! Tarang uing boa benjol…” Aki Balangantrang jeung
nini Balangantrang nyarekelan tarangna sewang-sewangan. “ Nini nya ku nyaneh bae tempona” Si Aki nitah
nempo ka Si Nini, bari kusiwel ngaluarkeun bako jeung daun kawungna.
Terus nu aya dina eta kandaga teh ku Si Nini
ditempo, Nini Balangantrang mata simeuteun
bari pacampur reuwas, atuh Si Aki nanya : “ Aya naon Nini mani pias kitu siga
neuleu bujur nu ngarewig bae? “ Si Nini bari amunyun pok nyarita : “ Yeuh
aki-aki kolot ku nyaneh ulah sisiwo bae,
tah tingali, geuning orok nu aya dina kandaga teh bari digendeng ku endog dua!
“ Si aki terus nyampeurkeun ngadeukeutan kandaga tea, ayeuna mah Si Aki nu
ngajenghok teh bari nyarita rada tarik : “ Euleuh-euleuh nini, heueuh geuning
orok nya ! Orok lalaki deuih! Saha atuh nu tega miceun ieu budak.! “ Geus ulah
haliwu Aki, meureun ieu hartina Nini ngimpi ngajul bentang teh ! Kabeneran
pan urang teh teu boga budak, urang
kukut be!” Si Nini nermpas omongan Si Aki.
Orok teh ku
Nini Balangantrang diais tuluy mulang, diiringkeun ku Aki Balanhgantrang
bari mawa kandaga nu di jerona masih keneh aya barang bekel orok, nya eta endog
hayam dua siki, ceuk dina pikirna sewang-sewangan :“ Keun bae teu meunang lauk
ge, da meunang budak.”
Orok teh ku Nini jeung Aki Balangantrang
dirorok tur diaku anak. Dina hiji waktu
anu tangtu kalayan dina wanci anu mustari, eta murangkalih jeneng raja di
Galuh.
Tina peperenian carita karuhun
Diropea ku nimasgaluh
Jatinagara, 2010
Tina peperenian carita karuhun
Diropea ku nimasgaluh
Jatinagara, 2010
Tidak ada komentar:
Posting Komentar