Carita dapon carita
Nyolengkrah
teu puguh salangsurup
Komo
keuna kana enasna
Digunasika
dina reka kawas perceka
Nu
aya kalah hapa
Hanjelu
ku siki hanjeli gening kahalodoan
Miang seja mapag kabagjaan
Nalikeun wiwitan rundayan
Nyiwit carita lawas nu gugon papagon
Lain mungpang tapi nemonan pangajen nu mawa harepan
Neundeun catur balarea yen bihari kungsi ngedalkeun kaheman
Katalikung pasang subaya mikung dina papayung nu suwung
Sajatina purbastisi purbajati
Ngajegkeun nagari aya na harga diri enggoning nanjeur di buana
Geus kajudi carita lalakon nu kamari
Kiwari moal sajalantrahna nu nepi
ka sekeseler
Da puguh eces saha nu nyakrawati
Geura guar tutungkusan
Kacingcirihi diri nu nyangkaruk
Lilana Saumur dumelah
Nyingray mapag ciciren
Muru dayeuh anyar mangsa tarate
mangkak
Kaheman
salira kasaput sutra jingga
Ngagedurkeun ambisi nu
sumarambah
Teu kaampeuh nyedek neuleumkeun
asih nu melentis
Bawaning ngajadi moal suda
kapegat salaksa nyawa
Handeuleum muguran lain wayah
Jadi saksi nu ngabigeu
Ngantay carita teu eureun
cumalimba dina catur balarea
Leunjeuran asih nu wening ngagurat natrat
Najan dipindingan
salaksa reka perdaya
Teu
galideur anggeur tigin nyiliwuri
Mawa
tangara komara karahayuan
Sampeureun rundayan nu nyata sakaruhun
Salira
ngajanteng ngawaskeun nu calik sisi empang
Angin ngadalingding nyandak
harewos tresna
Tepang munggaran pinuh harepan
Pikeun
nyanding kakasih
Ngolepat mancawura diteureuy
pepedut
Dina simpangan kaheman
Anjeun linggih nyandet pasini
Nu teu kasorang di buana tatar raga kawarti
Seja nalikeun jalur rundayan nu pegat
kasapih lajuning mangsa
Muga aya nu neruskeun pikeun tandang
Dangiang Galuh ngahiap nganti padungdung
Lulurung kalbu nyangreud pasini
Patimu
mangsa anyar pinanggih
Sirung
asih kasapih cidra nu nyiliwuri
Ngendagkeun
nagari pasiuh dina carita
Nu
direka malar cumpon udagan kahayang
Nangtungkeun
diri dina kamagungan
Nincak
harupat pikeun neundeun kahadean
Sulaya
jeung kanyataan
Teu enggeuh jaga bakal ditagih
Nu
nyucruk enasna lalakon
Sanajan
dipindingan kadali papayung ugeran da puguh semu
Bedah
neangan tatapakan nu kungsi kabunikeun
Eces
narembongan ngagelar nu jadi hakna
Katalimbeng
aweuhan galura karumasaan
Ngabedah rasa nu campuh
Malipid mawa sungkawa nu ngageuri
Nyaliksik diri ngawisat raga
Nu ngan saukur rokrak
Na dadampar alam
Seja pasrah ka Yang Agung
Seja pasrah ka Yang Agung
Mangsa
nu kasorang nganteur pangalaman
Ngagalur parentul
Sanaos seueur nu samar-samar
Tingarudat ngagenyas katojo cahaya kahuripan
Moal suda ngantay carita nu teu weleh
Ngahiap panggupay tineung
Najan paanggang ngalangkang na emutan
Nyangkaruk dina tresna nyampay kaheman
Mangloh raratan nu kabunikeun jaman
Lantaran ngancik ku pangreremo reka perdaya
Ngaleungitkeun kaweningan ati tur
kalantipan pikir
Na ringkel kolbu
Sajatining rasa nu mo ngabias
Ajeg ka ILLahiah turta pinuh ku Nur
alannuri Husirulloh
Mangka pijauheun
larsup rupa-rupa nu teu dipiharep
Bashiroh wening pinuh
ku Zat ILLAHI
Jeung tangtu waris
tur hak nyangkaruk minuhan acining hirup
jeung huripna
(ku nimasgaluh)
Tidak ada komentar:
Posting Komentar